Agiri honetan Ikastetxeko Hezkuntza Proiektuaren (IHP) garrantzia azpimarratzen da, eskola-heziketa hezkuntza- eta komunitate-sare sozialean txertaturiko zerbait gisa ulertzeko eta berarekin elkarreraginean. Herritargo aktiboa, elkarbizitzarako prestatua, balio demokratikoekin konpromisoa bereganatutakoa, erantzukizunaren etikaren bitartez giza eskubideen unibertsaltasuna defendatzen duena garatzeko hezkuntza hori ezin muga daiteke ikasgai baten ordutegi hutsera. Bai eskola curriculuma, bai ikastetxeko antolakuntza komunikazio eta partaidetzazko komunitate bakarra bihur daitezen beharrezkoa da, bertan ikasle-irakasleak, familiak, komunitatea, tokiko administrazioa, hezkuntza administrazioa, gobernuz kanpoko erakundeak eta partekatzeko historiak dituzten elkarte eta erakunde guztiak bertan txertaturik.

Intermón Oxfam-ek garatu du txosten hau, erakunde eta elkarteek parte har zezaten Hezkuntza eta Zientzia Ministerioak deituriko LOE garatze-prozesuari eginiko ekarpenekin. Txosten honen arabera, herritargo globalerako hezteak esan nahi du gure ikasleen balio, jarrera eta jokabideak pixkanaka alda daitezen heztea dela. Hori erdiesteko, ordea, ikasleak ikuspegi globaletik herritargoa egikaritzeko prestatu behar ditugu, elkarrenganako errespetua, aniztasuna lehenestea, giza eskubideen aurreko errespetua, ingurugiroarekiko errespetua eta kontsumo arduratsua sustatuz eta transbertsaltasunaren aldeko apustua eginez, argi eta garbi. Curriculumaren printzipio orientatzaile denetan herritargoak presente egon behar du etapa denetan, eta ezagutza-area denak blaitu behar ditu.

Bere hitzaldian Óscar Jarak gogoeta egin dezagun proposatuko digu, azken hogei urteotan parte hartu duen sareetan metaturiko eskarmentua abiagune izaki. Izan ere, 1981ean sortu zen eta Jara 1982tik gaur arte koordinatzaile izan duen Erdialdeko Amerika eta Mexikoko "Alforja" herri-hezkuntzarako sareari heldu dio bereziki. Artikulu honetan Óscar Jarak, bere iritziz, sarean landu beharko liratekeen hainbat aspektu eta gogoeta planteatuko ditu.

Artikuluari amaiera emateko, Paulo Freire-ren esaldi hau dakar Óscar Jara-k: "Hezkuntza askatzaileak, berez, ez du aldaketa sozialik eragiten. Baina hezkuntza askatzailerik gabe ez da izango inongo gizarte aldaketarik." Ondorio gisako aipamen horrek Óscar Jarak bere artikuluan adierazten dituen eduki eta hausnarketak islatzen ditu, herri-hezkuntza askatzaile baten alde egitea hezkuntza bera osagai duen gizartea aldatzearen alde egitea dela berretsiz; horren alde egiteak historian balio etikoak gauzatu egin daitezkeen itxaropen eta konfiantza badugula eta hori lortzeko lanean hezitzaileek erantzukizuna dutela esan nahi du.

Mundua eraldatzeko indarra izango duen heziketa egoki baten laguntzaz bultzaturik, bestelako gizarte bat eratzea posible dela etsi-etsian sinesten duten hainbat herrialdetako hezitzaileen erakundeek kolektiboki osatu dute agiri hau. Hori lortzeko, gure ustez premia larrikoa da eskolan herritargo globalerako hezkuntza sustatzea, bizitzarako hezkuntzaren markoan; halakotzat jotzen dugu arduratsuak izango diren, eta Planetako justizia eta iraunkortasunarekin konpromiso hartua izango duten herritarrak prestatzen lagunduko duen hezkuntza, gizakia aberasteko iturri den heinean, aniztasuna estimatu eta errespetatzea, ingurugiroa eta kontsumo arduratsua defendatzea, giza eskubide indibidual eta kolektiboak errespetatzea, generoen berdintasuna aintzat hartzea, liskar eta gatazkak konpontzeko tresnatzat elkarrizketa, gizarte zuzenago eta solidarioago baten sorreran parte hartzea, erantzukizuna eta konpromisoa lehenesten dituena, hitz batez.

"Herritargo globalerako hezkuntza" lehen Mintegia Las Matas-en (Madril) egin zen 2006ko uztailaren 6, 7 eta 8an eta mundu zuzenago eta solidarioago lortzeko amets partekatua xede zuen ibilbidearen abiapuntua izan zen. Erronkan laurogeita hamar lagunetik gora hartu zuten esku. Irakaskuntza praktikaz gogoeta egitera, geure errealitatea aztertzera eta geure buruari galdera berriak egitera deitu zitzaigun edizio hartan. Horren emaitza izan ziren ikaskuntza pertsonal eta kolektibo ugari. Horietako batzuk agertu dira memoria honetan, hara aurkibidea: Aurkezpena Herritargo globalerako hezkuntza Munduak elkarrekin lotuz: elkartrukatze eta parte hartzeko proposamen telematikoa Herritargo globalerako hezkuntza-proposamenak eta eguneroko praktika (talde-lana) Herritargoa sortzea Geure errealitatearen azterketa (talde-lana) Herritargo globalerako hezkuntzaren markoko esperientziak Intermón Oxfam-en proposamena, herritargo globalerako hezkuntzaren markoan...