Komiki baten irakurketa bitartez bi kontzeptu (partaidetza soziala eta sentsibilizazio kanpaina) eta aldaketak eragiteko horien baliagarritasuna jorratuko dira. Etiopiak bizi duen lehorte gorriaz telebistak eman duen albistearen inguruan, tabernan, lagunarte giroan izaniko solasaldia jaso du komikiak. Albista horretan oin harturik, Nestlé firmak Etiopiako Gobernuari sei milioi dolar erreklamatzen dizkiola jakinarazi da. Egoera hori aurkeztean tabernan sortu den eztabaidak ikasleen taldean jorratu beharreko gogoetarako sarbide gisakoa izango da. Bakoitzak bere kasa komikia irakurri ondoren, eginiko galderez eta sentsibilizatze kanpainen baliagarritasunaz gogoetari ekingo zaio. Jarduera honek ordubetea iraun dezan aurreikusi da.

Argentinako gizarte-eztandari dagozkion irudi eta testuak irakurri eta aztertzearen bidez, herrialde horretako krisi ekonomikoaren zergatien konplexutasuna aurkeztuko da. Trukea milioika argentinarrentzat bizirauteko moduetako bat bihurtu du: bertako herritarrei formula honetaz baliarazi dien egoera sozioekonomiko baten adibide gisa aukeratu dugu kasu hau. Testua irakurri eta eginiko galderei erantzun ondoren, gaia bere tokian finkatzen lagunduko duen gogoeta bat denen artean egin beharko da. Jarduera honek ordubetea iraun dezan planteatu da.

Egiazko kasu bat agertuz, bidegabekeriazko merkataritzaren adibide bat aztertuko da: Haitin Estatu Batuek eragiten duten arroz dumping-a, hain zuzen. Horrela, merkataritza arautzen duten legeak eta Hego aldeko herrialde baten elikagaien askitasunaren arteko proportzioa agerian jarriko da. Horretarako, kasu horri buruzko informazio-fitxa bat irakurri eta aztertzea proposatuko da. Jarduera ordubeteko bi saiotan aurkeztuko da.

Ekonomia gaietako testuak irakurri eta iruzkintzetik abiatuta, nazioarteko merkataritza eta bera arautzen duten legeen kontua jarriko da aztergai. Helburu nagusia, merkataritzaren liberalizazioaren, horren balizko onuren eta balizko aukera onen inguruko egungo diskurtsoa aztertzea da. Era berean, Ipar eta Hego herrialdeetako gizakiek merkatuetara iristeko aukera berberak ez dituztela azpimarratu nahi da. Jarduera hau ordubetean egitea aurreikusita dago.

Kasu erreal batzuk irakurtzeari esker merkataritza konbentzionalaren ordezko aukera bidezko merkataritza sartu eta bultzatu, kontsumo arduratsua sustatu eta, merkataritza-sistema barnean, parte hartzea indartu nahi da. Kasu horiek irakurritakoan, horrelako merkataritzak dituen abantaila eta eragozpenez gogoeta egingo da eta, ondoren, presio-ekintza bat egiteko proposamena jaurtiko da: bidezko merkataritzako produktuak sal daitezen proposatuz edo eskatuz, eskutitzak idatzi eta inguruko denda eta supermerkatuetara igorriko dira. Jarduera honek ordubetea iraun dezan planteatu da.

Jarduera hau, galdetegi bati erantzun eta, ondoren, prentsa ebakinak irakurri ostean burutzea planteatzen da. Dirua baliatzen ez diren elkar trukatze sistemez gogoeta egiteko aukera emango digute horiek. Galdetegiak, orokorki, hainbat kontzeptu sartzen ditu: diruaren balioa, erabilgaritasuna, premia... Ondoren, jorraturiko gai horiek aztertzeko, debatea egitea proposatzen da. Jarduera hau egiteari gutxienez ordubetea eskaintzea aurrikusten da.