Jarduera honetan, Garapenean Doazen Herrialdeen (GDH) zorra kitatzearen inguruko rol eta eztabaida joko bat ikusiko dugu, herrialde horien kanpo-zorra kitatzeko justizia eta premiaz sakoneko gogoeta egin dezagun sustatzeko eta, era berean, zorra kitatzea borondate politikoari dagokion gaia dela ikustarazteko. Horretarako, kitapen horren bideragarritasun ekonomikoa frogatuko duten zifrak erakutsiko dira. Taldea bitan banatuko da, bata kitapenaren alde eta bestea, aurka. Eztabaida amaitzean, ikaskideen argudioak entzunik, ekarritako iritzia aldatu duten partaideak zenbatuko dira.

Garapenean doazen Herrialdeen (GDH) zorrak nolako bilakaera izan duen jakitea, zor hori sortarazi duten zergatiak eta zorraren biderkapena eragiten duten mekanismoak aztertzea da jarduera honekin lortu nahi dena. Horretarako, kanpo-zorraren jatorri eta ondorioen gaineko testua eta komikiak irakurri eta aztertuko dira eta, era berean, GDH horientzat kanpo-zorrak dituen eraginak ahoz eta idatziz iruzkinduko dira. Jarduera honen iraupena bi ordukoa izango da.

Giza Garapenaren Indizearen (GGI) taulatik hasita eta Biziki Zorpeturiko Herrialde Txiroen (BZHT) mapa eskuetan, pobreziaren eta kanpo-zorpetze mailaren arteko lotura ondorioztatu ahal izango da. Lehendabizi, GGI horien datuak ikusi eta aztertuko dira, hiruzpalau laguneko taldeetan. Ondoren, planisferioan berrogeita bi BZHT horiek kokatu eta aurreko informazioarekin lotuko dira. Azkenean, talde txikitan ondorioak idatzi eta denek ezagutaraziko dizkiote elkarri. Jarduera honen iraupena ordubetea izango da.

Hainbat testu irakurri ondoren, txirotutako herrialdeen eta berorien kanpo-zorraren mailaren arteko erlazioa ondorioztatu behar da. Lehendabizi, kanpo-zorraren gaia aurkezteko familia zorretan sartzeko beharretik begiratuko zaio eta, ondoren, gaia ikuspegi orokorretik jorratuko da. Jarduera honek ekonomian funtsezkoak diren kontzeptuak —kanpo-zorra, zorraren zerbitzua, etab— lantzeko eta nazioarteko merkataritzaren errealitatera eta nazioarteko finantza erakunde nagusietara gertura gaitezen aukera ematen digu. Bi orduko iraupena izango du.

Jarduera honetan nazioarteko finantza erakundeen jatorria eta funtzionamendua aztertzen dira: Nazioarteko Moneta Funtsa (NMF), Mundu Bankua (MB) eta Merkataritzaren Mundu Erakundea (MME). Helburua, egungo nazioarteko egoera ekonomikoan horiek izan duten erantzukizuna ulertzea da. Testu batzuk irakurri eta grafiko zenbait ikusi ondoren, hainbat galdera erantzun beharko ditu ikasleak. Jarduerari amaiera emateko nazioarteko organismoen rolaz gogoeta egingo dute denek elkarrekin eta, ondoren, hori aldatzeko proposamenak aurkeztuko dituzte. Jarduera hau ordubeteko saioan burutu dadin aurreikusi da.

Simulazio joko honetan nazioarteko merkataritzazko harreman konplexuak ulertzeko aukera ematen da eta, aldi berean, gure sistema arautzen duten mekanismo ekonomikoetako batzuk erakusten ditu. Jokoaren bitartez, egungo nazioarteko merkataritza sistema honek planetako biztanleriaren gehiengo bati pobrezia larriagoa eragin eta, elikadura alorrean, segurtasuna urritzen diola erakutsiko da. Jarduera horrek, era berean, ekonomi hiztegi klasikoa jorratzeko aukera emango digu: ekoizpen kostuak, prezioak, merkatua, zorra, dumping-a, etc. Jarduera hau egiteko gutxienez ordubeteko hiru saio hartzea aholkatzen da: bata, jokoa bera garatzeko; beste bat, hori aztertzeko eta, hirugarrena, errealitatearekiko paralelotasuna ezartzeko.

Simulazio joko baten bitartez, nazioarteko merkataritza arautzen duten legeak, jarduera horrek herrialdeen baitan dituen ondorioak ulertzea eta, testuinguru horretan, arazoen konpontze negoziatuak nola funtzionatzen duen erakustea nahi da. Horretarako, taldea bitan banatzen da; parte bakoitza bere interesak dituen herrialde bat izango da. Negoziazio erronda bat simulatzen duen jokoari ekingo zaio, hortik abiatuta. Jarduera hau bi orduko saioan burutu dadin aurreikusi da.