Monografiko honek, sexuaren arabera bereizitako jokabide-eredu eta elementuak identifikatzeko aukera emango dio ikasleari. Zortzi jardueraren bitartez genero-kontua jorratu nahi da hemen hainbat ikuspegitatik, bereizketa horren aurrean jarrera kritikoak bultzatzeko. Hurbilenetik —famili girotik— hasita, urrutienekora goaz: Lorna neskatila kenyarrak eskola utzi behar izan du. Adibide horretan oin harturik, duintasunez bizitzeko oinarrizko premiak zein diren nabarmenduko du monografikoak eta, bide batez, hezkuntza, elikadura, aisia, osasuna, zoriontasuna eta beste hainbat premiazko eskubideren unibertsaltasuna planteatuko du. Landutakoaren sintesi gisa, monografikoak gutun kolektibo bat idaztea iradokiko du azkenean, sexuen bereizketan oinarrituriko aukera-desoreka konpon dadin erreklamatuz. Eginkizun hau lau eskola-saiotan lantzeko planteatuko da.