Jarduera honetan Fernando Meirelles-en Ciudad de Dios erreportajea ikusi eta iruzkinduko da. Filma proiektatu aurretik, norberak indarkeriaren sortzaile edo biderkatzailetzat jo ditzakeen irudi, datu edo bestelakoak apuntatzeko orri zuriak banatuko dira parte hartzaileen artean. Filma ikusitakoan, ideia-jasa egin eta ekarpen guztiak bilduko dira. Jardueraren helburua, armen erabileraren eta indarkeriaren kulturaren zergatiak aztertzea eta, era berean, horien ondorioak atzematea da. Brasilgo egoeraren inguruko informazio osagarria emango da. Jarduera hau egiteko gutxienez bi ordu hartzea aholkatzen da.

Egoera gatazkatsu baten simulazioa eta bera konpontzeko hainbat bide aurkeztuko dira. Hiru pertsonaiak gidoia antzeztuko dute eta, horrek, bakoitzak harturiko aukera edo erabakien arteko eztabaida sortaraziko du. Jarduera honekin lortu nahi dena ez da liskarra konpontzea, ezta konpontzeko bideak adieraztea ere; arazo baten aurrean, pertsona batek har ditzakeen jarrera desberdinak adieraztea da kontua. Istripua jasan dutelarik, obrako protagonisten gogoetei esker, egoera latz bati aurre egiteko jarrera desberdinak ikusiko dira eta arazoen aurrean norberak hartzen duen jarreraz hausnarketa egingo da. Jarduera honek ordu pare bateko iraupena izatea aurreikusi da.

Rol joko honetan balizko (baina, era berean, ohiko) egoera bat antzeztuko da, pertsonaia jakin batzuen arteko eztabaida pizteko asmoz. Pertsonaia horiek adostasunera iritsi beharko dute, arazoaren definizioa eta konponbideak eskainiz. Joko honetan liskarretako bitartekaritza-prozesua simulatzen da; bertan, artekariak (joko bizkortzaileak) alderdien arteko adostasunera iristeko bidea kudeatuko du. Jarduera honekin, eztabaidarako eta liskarren konpontze baketsurako gaitasunak eskuratzea lortu nahi da. Horretarako, rol edo pertsonaiarekin bat datorren jarrera bat argudioekin justifikatu, egiazko sentimenduak eta errealitateko egoerak modu simulatuan bizi eta konponbideak bilatu behar dira. Jarduerari amaiera emateko, pertsonaien jokabide eta argudioez gogoeta kolektiboa egingo da, esperientziaren talde-ebaluazioan euskarri hartuta. Jarduera honek bi orduko iraupena izatea aurreikusi da.