Argazkiak ikusi eta testuak iruzkintzearen bidez, gizakiengan —haurrengan, batik bat— gerrak dituen ondorioak aztertuko dira. Jarduera ordubeteko bi saiotan egiteko aurreikusi da. Lehenean, Gervasio Sánchez-en Vidas minadas, cinco años después liburutik hautaturiko hainbat argazki izango dira aztergai; bigarrenean, gerrak haurrengan dituen ondoreak —haur soldaduak erreklutatzea, liskarraren eraginengatik geratzen diren umezurtzak, mutiko eta neskatoak kartzelaratzea, etab— erakusten dituzten bi prentsa-artikulu irakurriko dira. Jarduerari amaiera emateko, jorraturiko informazio guztia taldean aurkeztu eta horrek sortarazi dituen sentsazioez eztabaida egitea proposatzen da.

Jarduera honen helburua, liskar armatuek biztanleria zibilean dituzten ondorioez kontzientzia harrraraztea da. Horretarako, liskar batzuetako lekukotzak irakurriko dira eta, elkarrizketak eginez, Espainiako Gerrate Zibilean zaharrek nozituriko bizipenak jasoko zaizkie elkarrizketatuei. Helburu nagusiak, biktima zibila egungo liskar armatuetako jo-puntu nagusiak direla frogatu eta aitortzeaz gainera, zeinahi gerrak biztanleria zibilean dituen ondorioak aztertzea da. Jarduera, elkarrizketaz gainera, ordubeteko bi saiotan egiteko aurreikusi da.

Jarduera honetako helburua,indarkeriaren eta beldurraren kulturaren transmisioan hedabideek duten rola aztertzea da. Black Eyed Peas taldearen Elephunk CDan datzan Where is the love? abestitik abiatuz, hedabideetan indarkeria kulturalaren normalizazioan, kontsumitzaile garen aldetik, betetzen dugun rolaz eta daukagun erantzukizunaz gogoeta egitea proposatzen da. Dinamika gisa, kanta eta letra entzutea eta, ondotik, taldeari eztabaidan aritzeko atea zabalduko dion galdetegi bat erantzutea planteatzen da. Kanta ingelesezko jatorrizko bertsioan edo, bestela, itzulirik jorratu daiteke. Jarduera honen iraupena ordubetea izango da, letra itzulirik arituz gero edo ordubeteko bi saio egin daitezke, letra jatorrizko bertsioan nahiago izatekotan.

Jarduera honetan, Michael Moore amerikar zuzendariaren Bowling for Columbine pelikula ikusi eta eztabaidan aritzea proposatuko da. Filmaren bidez armen erabileraren eta indarkeriaren kulturaren zergatiak aztertuko dira. Dokumentalak, zuzeneko indarkeriaren erabilera sustatzen duten jarrerak azalerarazten duten balizko faktore batzuk adierazten ditu, hala nola jabetza-sentimendua, segurtasuna bilatzea, nagusitasun sentimendua... Filma ikusi aurretik, taldekide bakoitzari orri zuri bana partitzea proposatzen da, bertan norberak "Jendea zergatik hornitzen da armaz?" galderari hiru arrazoi eman diezazkion. Pelikula amaitzean, norberak emaniko arrazoiak taldean aurkeztuko dira eta taldekide guztiek ateratako ondorioekin txantiloi bat beteko da.