Berrogei erakunde baino gehiagok herritargo demokratikorako eta giza eskubideetarako hezkuntza Espainiako eskola-curriculumetik kentzea Europako Kontseiluan salatu dute
Salaketa sinatu duten erakundeek, herritargo demokratikorako eta giza eskubideetarako hezkuntza eskola-curriculumetik ezabatzeko Espainiako Gobernuak duen proiektuaren inguruko memoranduma Europako Kontseiluan aurkeztuko dute
Hezkuntzaren Kalitatea Hobetzeko Lege Organikoaren zirriborroak herritargo demokratikorako eta giza eskubideetarako hezkuntza eskola-curriculumetik kentzen ditu. Salaketa sinatu duten erakundeek gogorarazi dutenez, giza eskubideetan, pobrezia eta desberdintasunaren zergatietan eta justizia sozialean heztea ezinbestekoa da herritargo aktibo eta kritikoa sustatzeko.
“Europako Kontseiluaren organorik gorenei Gobernu espainiarrak gauzatu nahi duen urraketa larri horren berri ezagutarazi nahi diegu; desmasia hori, egia bihurtzekotan, sekulako atzerakada izateaz gainera, Kontseiluko kide diren estatuetan herritargo demokratikorako eta giza eskubideetarako hezkuntza ezartzearen kontrako aurrerakin ezinago larria izango litzateke. "Horrek adieraziko luke, era berean, hezkuntzaren helburu honek gaurdaino izan duen hedapenaren haustura", esan zuen Victorino Mayoral CIVES Fundazioko Presidenteak.
“Hezkuntzaren Kalitatea Hobetzeko Lege berriak aukeren berdintasunaren inguruko irizpideak emaitza akademiko hutsen atzean uzten ditu eta, gainera, pobrezia, desberdintasuna, garapena eta antzeko kontuak kritikoki aztertzeari saihets egiten dio. Hezkuntza-eredu elitistago eta banatzaileago batera garamatza eta, herritar aktiboen ordez, hiritar otzan eta konformistagoak izatea sustatuko du", adierazi du Intermón Oxfam-eko Kanpainak eta Herritargoa departamentuko buru den Jaime Atienzak.
Europako Kontseiluak herritargo demokratikorako eta giza eskubideetarako hezkuntza argi eta garbi aholkatzen du. Europako Kontseiluak 1997 urtetik egundaino aholkatu die Batasuneko estatuei herritargo demokratikorako eta giza eskubideetarako hezkuntza sar dezaten beren hezkuntza-politiketan. Horixe errepikatu du, behin eta birritan, hamaika gomendio, hitzaldi eta adierazpenetan. Hauen artean, nabarmen, Ministroen Batzordeak Herritargo Demokratikorako Hezkuntzaz eginiko Gomendioak (Rec(2002)12) eta Europako Kontseiluak Herritargo Demokratikorako eta Giza Eskubideetarako Hezkuntzaz eginiko Gutunak (CM/Rec(2010)7).
Espainiak hitzarmen horiek sinatu eta bultzatu ez ezik, bertako Alderdi Popularrak 2004 urtean Giza Eskubideetako Hezkuntza Programa bera ere izenpetu zuen.
Lege-proposamenak Europatik urrundu egin gaitu. Espainiako Gobernuak aurkezturiko proposamen horrek Europatik biziki urrunduko gintuzke, Batasuneko herrialde gehienek beren hezkuntza-curriculumetan herritargo demokratikorako eta giza eskubideetarako hezkuntzazko edukiak jasoak dituztelako. Eurydice-k 2012ko maiatzean argitara emaniko Citizenship Education in Europe-ren azken txostenaren arabera, herritargo demokratikorako hezkuntza Europako hezkuntza-sistema denetan etapa guztietan sartua dago. Giza eskubideei dagozkien edukiak, bere aldetik, Europako hogei herrialdetako (Alemania, Danimarka, Holanda, Portugal, Frantzia…) curriculumetan dautza.
Europako Kontseiluari eskaera. Egoera horren aurrean, honakoa sinatzen duten erakundeek Europako Kontseiluko Batzar Parlamentarioko presidente den Jean-Claude Mignon jaunari, Europako Kontseiluko OING Konferentziako presidente den Jean-Marie Heydt jaunari, Europako Kontseiluko Giza Eskubideen komisario den Nils Muižnieks jaunari eta Europako Kontseiluko Hezkuntza, Gazteria eta Kiroleko Azpibatzordeari beren kezka larria azaldu nahi diete, Espainiako lege berriak herritargo demokratiko eta giza eskubide kontuetako edukiak kenduko dituelako.
“Espainia ezin urrun daiteke Europatik, ezta nazioarteko batzordeetatik, giza eskubide eta herritargo demokratikorako hezkuntza kontuetan; nahitaezkoa da Europako Kontseiluak egoera horren berri izan eta Espainiako Gobernuari bere kezka azaltzea", adierazi zuen Espainiako Ikasleen Gurasoen Elkarteen Espainiar Konfederazioko presidenteorde den Jesus Salido jaunak.
“Giza eskubideek —emakumearen eskubideei eta aniztasun afektibo eta sexualari dagozkienak, bereziki— hezkuntza-maila denetan presentzia izan behar dute", esan du Amnistia Internationaleko Esteban Beltrán zuzendariak.
Salaketa sinatu duten erakundeek eskaera egingo diote Europako Kontseiluari, honek Espainiako Gobernuari galdegin diezaion:
- Lege-proiektuan, herritargo demokratikorako eta giza eskubideetarako hezkuntzazko edukiak hezkuntza-maila denetan sar daitezen, bai curriculumean zehazki, baita gaitasun soziala hartzeari dagozkionak.
- Genero-berdintasunaz, aniztasun afektibo eta sexualaz eta diskriminaziorik ezaz eduki esplizituak sartuko direla berma dezan, nazioarteko eta Europako gomendioek xedatutakoa betetzeko.
Hona hemen sinatu duten erakundeak: Fundación Cives, Amnistía Internacional, Intermon Oxfam, Confederación Española de Asociaciones de Padres y Madres de Alumnos (CEAPA), Fundación Cultura de Paz, Asociación Pro Derechos Humanos de España (APDHE), Proyecto Atlántida - Educación y Cultura Democráticas, Movimiento Contra la Intolerancia (MCI), Liga Española de la Educación y la Cultura Popular, Movimiento por la Paz (MPDL), Federación de Mujeres Progresistas, Coordinadora de ONGs para el Desarrollo, Periódico Escuela, Seminario Galego de Educación para la Paz, Hegoa - Instituto de Estudios sobre Desarrollo y Cooperación Internacional, Confederación Estatal de Movimientos de Renovación Pedagógica, Educación Sin Fronteras, Plataforma Ciudadana contra la Islamofobia, Instituto de la Víctima de Odio, Discriminación e Intolerancia, Institut de Drets Humans de Catalunya, Sección de Educación del Ateneo de Madrid, Fundación IPADE, Federación de Asociaciones de Defensa y Promoción de los Derechos Humanos - España, Asociación para las Naciones Unidas en España (ANUE), Asociación para la Defensa de la Libertad Religiosa (ADLR), Comisión Española de Ayuda al Refugiado (CEAR), Instituto de Estudios Políticos para América Latina y África (IEPALA), Justicia y Paz, Liga Española Pro Derechos Humanos, Paz y Cooperación, Mundubat, UNESCO Etxea, Plataforma de Mujeres Artistas contra la Violencia de Género, Coordinadora Estatal de Asociaciones Solidarias con el Sáhara, Federación de trabajadores y trabajadoras de la enseñanza (FETE - UGT), ISI Argonauta - Derechos Humanos y Desarrollo, Iniciativas de Cooperación Internacional para el Desarrollo (ICID), Fundación Alternativas, Asamblea de Cooperación por la Paz (ACPP), Consejo de la Juventud de España (CJE), etab.
Memorandumarekin bat egin duten europar erakundeak: Red Europea Contra los Crímenes de Odio, Citizens for Europe (197 erakunde europar), Foro Cívico Europeo (27 herrialdetako 100 erakundetik gora).
Memorandum horren laburpena irakurtzeko, sartu in: http://www.intermonoxfam.org/es/sala-de-prensa/nota-de-prensa/espana-debe-formar-en-ciudadania-democratica-derechos-humanos-desde-es


Guk bezala, herritargo globala lortzeko hezkuntzaren ideia eta proposamena babesten bere egiten dituzten estatu-mugez kanpoko hezitzaileekin ere harremanetan gaude.


















